കൊച്ചി: താനുള്‍പ്പെടെയുള്ള ആളുകളുമായി രാഹുല്‍ മാങ്കൂട്ടത്തിലിനുള്ള അടുപ്പമോ അടുപ്പക്കുറമോ വിഷയത്തില്‍ പാര്‍ട്ടി എടുത്ത തീരുമാനത്തെ സ്വാധീനിച്ചിട്ടില്ലെന്ന് ഷാഫി പറമ്പില്‍ എംപി. നിയമപരമായ കാര്യങ്ങളെ തടസ്സപ്പെടുത്താന്‍ കോണ്‍ഗ്രസ് പാര്‍ട്ടിയോ രാഹുലുമായി വ്യക്തിബന്ധമുള്ളവരോ ഇല്ലാത്തവരോ ശ്രമിക്കുന്നില്ലെന്നും ഷാഫി പറഞ്ഞു.
'കോണ്‍ഗ്രസ് നേതാക്കള്‍ അവരുടെ വ്യക്തിപരമായ അഭിപ്രായങ്ങളാണ് അത്തരം കാര്യങ്ങളില്‍ പറയുന്നത്. ആ അഭിപ്രായങ്ങള്‍ പാര്‍ട്ടി നടപടിയെടുക്കുന്നതിനെ തടസ്സപ്പെടുത്തിയിട്ടില്ല. ഞാനുള്‍പ്പെടെ അടുപ്പമുള്ള ആളുകളുടെ അഭിപ്രായം പോലും പാര്‍ട്ടി ചെയ്യേണ്ട കാര്യങ്ങളില്‍ നിന്നും പാര്‍ട്ടിയെ പിന്തിരിപ്പിക്കുന്നില്ല. നിയമനടപടി സ്വീകരിക്കുന്നതിന് മുമ്പ് തന്നെ മറ്റേതൊരു പാര്‍ട്ടി ചെയ്യുന്നതിനും വിഭിന്നമായി പാര്‍ട്ടി നടപടി സ്വീകരിച്ചിട്ടുണ്ട്', എന്നായിരുന്നു ഷാഫിയുടെ വാക്കുകള്‍.
പാലക്കാട് തദ്ദേശ തെരഞ്ഞെടുപ്പില്‍ രാഹുല്‍ പ്രചാരണത്തിന് ഇറങ്ങിയത് പാര്‍ട്ടിയുടെ നിര്‍ദേശപ്രകാരമല്ലെന്നും ഷാഫി പറമ്പില്‍ പറഞ്ഞു. പ്രചാരണം നടത്തുന്ന ഘട്ടത്തിലൊന്നും നിയമനടപടിയെന്ന ഘട്ടത്തിലേക്ക് പോയിട്ടില്ല. നിയമസഭാ തെരഞ്ഞെടുപ്പില്‍ പ്രാദേശികമായി അദ്ദേഹത്തെ സഹായിച്ചിട്ടുള്ളയാളുകള്‍ തദ്ദേശതെരഞ്ഞെടുപ്പ് വരുമ്പോള്‍ അദ്ദേഹത്തിന്റെ സാന്നിധ്യം ആവശ്യപ്പെട്ടിരുന്നു. പാര്‍ട്ടി ഔദ്യോഗികമായി തീരുമാനിച്ചിട്ടില്ല. പ്രാദേശികമായി നടന്നിട്ടുള്ള കാര്യമാണെന്നായിരുന്നു ഷാഫിയുടെ വിശദീകരണം.
രാഹുലിനെതിരായ ആരോപണവും നിയമനടപടിയും ഉള്‍പ്പെടെയുള്ള കാര്യങ്ങള്‍ പാര്‍ട്ടിയുടെ യൂത്ത് മൂവ്‌മെന്റിനെ തടസ്സപ്പെടുത്തിയില്ലെന്നും ഷാഫി പറമ്പില്‍ പറഞ്ഞു. ഒരാളെ മാത്രം ആശ്രയിച്ചുനില്‍ക്കുന്ന ഒന്നല്ല ഇതൊന്നും. അതൊരു സമ്പൂര്‍ണ്ണ മുന്നേറ്റമാണ്. ഇത്തരം കാര്യങ്ങളൊന്നും അതിനെകുറക്കുന്നില്ല. അത് തുടരും. പൂര്‍ണ്ണമായി അതിനെ തകര്‍ക്കുന്ന ഒന്നും ഉണ്ടായിട്ടില്ല. അബിന്‍ വര്‍ക്കി, അഭിജിത്ത്, ഒ ജെ ജനീഷ്, അലോഷി സേവ്യര്‍ അടക്കം നേതൃത്വ തുടര്‍ച്ചയുണ്ടാകും. ഇവര്‍ അടുത്ത നിയമസഭയില്‍ വേണമെന്ന് ആഗ്രഹിക്കുന്നയാളാണ് താന്‍. വര്‍ക്കിംഗ് പ്രസിഡന്റ് എന്ന നിലയില്‍ അതിന് വേണ്ടി ബാറ്റ് ചെയ്യുന്ന ഒരാളുമാണ് എന്നും ഷാഫി പറഞ്ഞു.
വി ഡി സതീശനുമായുള്ള അടുപ്പത്തില്‍ കുറവ് വന്നിട്ടുണ്ടോയെന്ന ചോദ്യത്തോട് അതെല്ലാം വാര്‍ത്തകള്‍ മാത്രമാണെന്നായിരുന്നു ഷാഫിയുടെ മറുപടി. തദ്ദേശ തെരഞ്ഞെടുപ്പും നിയമസഭാ തിരഞ്ഞെടുപ്പുമാണ് അജണ്ടയെന്നും അദ്ദേഹം കൂട്ടിച്ചേര്‍ത്തു.
Content Highlights: party's decision on the issue was not influenced by Rahul's closeness with leaders said Shafi Parambil